У гасцях у "Вясёлкі"
У 2017 годзе спаўняецца 60 гадоў найстарэйшаму
дзіцячаму часопісу “Вясёлка”. Васіль Вітка – класік беларускай дзіцячай літаратуры, стаў першым адказным рэдактарам
часопіса і працаваў у ім амаль 20 гадоў Потым былі Еўдакія Лось (1974-76) і Анатоль Грачанікаў (1976-78). З
1978 года часопіс узначальвае Уладзімір Сцяпаналіч Ліпскі. Усе гэтыя гады выданне трымаецца трох прынцыпаў, закладзеных яшчэ
некалі Янкам Маўрам, які таксама стаяў у вытокаў часопіса: каб дзеці да слёз
навучыліся любіць Беларусь, мову і каб шанавалі ўсіх тых, хто вядзе іх за руку.
Менавіта дзеля гэтага пісалі свае творы лепшыя беларускія аўтары, што многія
гады супрацоўнічалі з “Вясёлкай”: Эдзі Агняцвет, Раіса
Баравікова, Авяр'ян Дзеружынскі, Васіль Зуёнак, Павел Місько, Аляксандр Якімовіч і шмат іншых. Часопіс
- гэта вясёлка ва ўсіх сваіх колерах, у шматабсяжных
уплывах на юных чытачоў —
дашкольнікаў і малодшых школьнікаў, выданне, з якім і ў чытанні, і ў выхаванні
можна смела рабіць першыя крокі.
А на гэтых днях “Вясёлка” зазіхацела і ў нашай бібліятэцы. На сустрэчу з ёю прыйшлі
маленькія чытачы – другакласнікі. Яны толькі пачынаюць вывучаць мову, але з
цікаўнасцю знаёміліся з гісторыяй часопіса, разглядалі малюнкі, вельмі шпарка
адгадвалі загадкі і рэбусы з “Вясёлкі”, чыталі і нават расказвалі на памяць
беларускія вершы.