МОВУ
РОДНУЮ ВІТАЮ, НА ЁЙ ДОБРА РАЗМАЎЛЯЮ!
Пад такім дэвізам прайшлі ў бібліятэцы сустрэчы з
вучнямі пачатковых класаў. Кажуць, няма нічога больш меладычнага і салодкага,
чым гукі роднай мовы. Хлопчыкі і дзяўчынкі другіх класаў успаміналі, як на
беларускай мове гучаць назвы дзен тыдня, месяцаў года, часу сутак, разгадвалі
рэбусы і загадкі, чыталі беларускія вершы. На жаль, успрымаліся беларускія
словы большасцю вучняў, як замежныя. Дзеці толькі пачалі вывучаць беларускую
мову ў школе, дома яны размаўляюць па-руску, дзіцячыя тэлеперадычы таксама
глядзяць на рускай мове. У іх няма беларускага слоўнікавага запасу. Лепшы
сродак, каб выправіць гэта становішча, - чытаць кнігі на беларускай мове. Таму
сёння мы хочам пазнаёміць вас з цікавымі беларускімі кніжкамі, якія ёсць у
нашай бібліятэцы.
“РЭПКА”
Усім вядомая казка пра тое, як пасадзіў аднойчы на
сваім агародзе дзед рэпку.
Кніга выдадзена на беларускай мове, з цудоўнымі
малюнкамі. Яна адрасуецца самым маленькім, таму ўсе словы ў ёй разбітыя на
склады. Большасць дзетак ужо чулі гэтую казку на рускай мове, таму, калі
сустрэнуць незразумелыя словы, лёгка іх перакладуць.
“ЦЯРЭШКА”
Кніга, як і папярэдняя, з серыі “У свеце казак”.
Гэтую цудоўную серыю для маленькіх беларусаў надрукавалі ў выдавецтве ТАА
“Харвест”.
Казка пра тое, як драўляная калодачка ператварылася
ў хлопчыка Цярэшку. Украла таго хлопчыка Баба Яга. Але Цярэшка Бабу Ягу
абхітрыў.
“ЯК ДЗЕЦІ Ў ГАЙ УЦЯКЛІ”
Вельмі павучальная казка пра тое, як дзеці не хацелі
вучыцца і замест школы адправіліся ў казачны гай. Але ў лесе і жучок, і пчолка,
і страказа, і матылёк, і зайчык, і пчолка – усе былі занятыя справай, і ніхто
не схацеў з імі гуляць. Прыйшлося і дзецям адправіцца ў школу і пачаць вучыцца,
а не гультайнічаць.
Рабцэвіч Аліна
“КАЗКА ПРА ДАМАВІКОЎ І ПАЖАРНЫ
АПАВЯШЧАЛЬНІК”
А гэтую цудоўную казку напісала вучаніца шостага
класа Раздзялавіцкай сярэдняй школы Ганцавіцкага раёна Брэсцкай вобласці.
Дзяўчынка з’яўляецца прызёрам Рэспубліканскага агляду-конкурсу дзіцячай
творчасці “Выратавальнікі вачамі дзяцей”. Чытачы не толькі пазнаёмяцца з героямі казкі, але
яшчэ раз прыгадаюць, для чаго патрэбны пажарны апавяшчальнік.
А цяпер я хачу звярнуцца да бацькоў.
Паважаныя
бацькі! Чытайце дзецям кнігі на беларускай мове, купляйце ім кнігі. Гэтыя і
шмат іншых прыгожа аформленых з яркімі
малюнкамі беларускіх кніжак з серыі “У свеце казак” вы можаце набыць і ў
нашай кнігарні. Каштуюць яны зусім не дорага. І ў вашых дзяцей будуць прыгожыя
беларускія кнігі. Яны з маленства будуць прывыкаць да беларускага слова, бо, як
сказаў адзін вядомы чалавек, “жыць у
краіне і не ведаць яе мовы, гэта, самае малое, не ветліва».
