Падарожжа са смехам

         30 студзеня 2022 года споўнілася 75 гадоў нашаму земляку паэту-сатырыку Віктару Трафімавічу РЭЧЫЦУ. Амаль сорак гадоў Віктар Трафімавіч працаваў журналістам у нашай раённай газеце. Быў адным са стваральнікаў літаратурнага аб'яднання "Узлёт", дзе друкаваў свае вершы і байкі. Літаратурны набытак паэта — восем зборнікаў сатырычных і гумарыстычных вершаў, баек, жартаў, эпіграм, мініяцюр: «Залаты тавар» (1998), «Свой метад» (2004), «Далей ад граху» (2007), «Штатны сведка» (2010), «Сюрпрыз наадварот» (2014), «Паўцарства за ўсмех» (2016), «Гастролі» (2019) і «Форс-мажор» (2021).  З Віктарам Трафімавічам мы не аднойчы сустракаліся ў сценах нашай школы. Але на гэты раз свята з нагоды юбілея пісьменніка ладзіла раённая бібліятэка. Вучні 10 "А" класа разам са сваім класным кіраўніком Паляшчук Галінай Анатольеўнай пабывалі на гэтым мерапрыемстве. 

Сустрэцца з паэтам ці пісьменнікам "у жывую" заўсёды цікава, асабліва ка,лі ён жыве і працуе побач. Байкі Віктара Трафімавіча з гумарам, але без злосці, па добраму паказваюць жыццёвыя сітуацыі ці абставіны, ў якія трапляюць героі. Смех Віктара Рэчыца мяккі і добразычлівы, якім і павінен быць наогул шчыры народны досціп. Паэт нібы дае магчымасць сваім героям выправіцца, стаць лепшымі. Гумарэскі і байкі аўтар піша на мясцовым матэрыяле. А "матэрыяла" было заўсёды шмат. Па справах рэдакцыі Віктар Трафімавіч аб'ехаў не толькі ўвесь раён, але і вобласць і нават рэспубліку. Прыйшла на сустрэчу сказаць некалькі цёплых слоў пра юбіляра і наша паэтка Сцепанчук Святлана Яўгеньеўна, якая працавала разам з Віктарам Трафімавічам у газеце "Івацэвіцкі веснік".  

Кнігі Віктара Трафімавіча і Святланы Яўгеньеўны ёсць у нашай бібліятэцы.  Тыя, хто не папаў на сустрэчу, могуць пазнаёміцца з імі асабіста.